Trener fudbalera Reala Karlo Anćeloti izvinio se navijačima zbog poraza od Đirone rezultatom 4:2 u meču 31. kola La Lige.
Sva četiri gola za Đironu postigao je Valentin Kasteljanos.
“Ovo boli, moramo da se vratimo što prije. Bila je ovo jedna od najgorih noći. Jako teška… Svi su krivi, svi su bili loši. Neću o pojedincima, svi su odigrali ispod svog nivoa. Odbrambeno smo bili grozni. Baš grozni. Bili smo nervozni, nismo dobijali duele”, rekao je italijanski stručnjak, navode španski mediji, prenosi Tanjug.
On smatra da Real nije igrao kao ekipa na meču sa Đironom.
“Ovo što ste vidjeli nije bila ekipa. Izvinjavamo se navijačima. Ovo nije bila ekipna igra. Kada igramo kao ekipa, možemo svakog da pobijedimo. Kad ne igramo, dogodi se ovo”, istakao je Anćeloti.
Real se trenutno nalazi na drugom mjestu na tabeli La Lige sa 11 bodova manje od Barselone, ali madridski klub ima i meč više.